Paggunita ng Semana Santa, ‘generally peaceful’ – PNP

MANILA, Philippines — Idineklara ng Philippine National Police (PNP) na “generally peaceful” ang paggunita ng Holy Week sa kabila ng 28 insidenteng naitala sa iba’t ibang panig ng bansa.

Sa isang media readout nitong Biyernes Santo, iniulat ng PNP na 16 sa mga insidente ay kaso ng pagkalunod mula sa iba’t ibang rehiyon. Dalawa namang vehicular accidents ang naiulat sa Metro Manila at Cagayan Valley.

Tatlong sunog din ang naitala sa Metro Manila, Eastern Visayas, at Zamboanga Peninsula, habang may isang kaso ng arson sa Negros Island Region.

“Sa kabila ng mga insidenteng ito, nananatiling tahimik sa kabuuan ang sitwasyon,” ayon sa pahayag ng PNP.

Sa ilalim ng programang “Ligtas SUMVAC 2025,” higit 68,000 pulis ang ikinalat sa buong bansa upang tiyakin ang kaligtasan ng publiko. Kabilang dito ang mga nakatalaga sa mga lugar ng pagsamba (19,120), pangunahing lansangan (18,283), terminals (8,711), commercial areas (10,125), at mga pook-pasyalan (12,226). Santi Celario