MANILA, Philippines – Sinabi ni Interior and Local Government Secretary Jonvic Remulla na natapos na ang mga imbestigador sa pag-iimbestiga sa pagkamatay ni Dueñas, Iloilo Vice Mayor Aimee Paz Lamasan.
Ani Remulla, lumabas sa imbestigasyon na ang pagkamatay ni Lamasan ay dahil sa accidental firearm discharge.
“Our conclusion, after the recreation of the scene and events, testimonies of the people there, and examination of all aspects of the relationship, is that it was a death by accidental fire,” ani Remulla.
Sinabi nito na si Lamasan at ang partner nitong si Lord Byron Torrecarion ay nag-uusap bago ang insidente na nangyari alas-8 ng gabi noong Disyembre 30, 2025.
Habang nag-uusap, tinanong umano ni Torrecarion si Lamasan kung nais nitong magdagdag ng optics sa armas nito.
Dito tinanong ni Lamasan kung maaari nitong makita ang baril, na sinabi ni Remulla na pagmamay-ari ni Torrecarion bago ito nailipat sa vice mayor.
Ayon kay Remulla, ang armas na sangkot ay isang race gun na kinabibilangan ng isang “very light trigger.”
Nang bitbitin ni Lamasan ang baril ay mali ang naging paghawak nito dahilan para makalabit ang gatilyo at aksidenteng maiputok sa sarili.
“When it was open, she picked it up in the wrong way. When she picked it up with her thumb on the trigger, it resulted in an accidental fire,” sinabi ni Remulla.
Pumasok sa tiyan ni Lamasan ang bala na tinukoy bilang hollow-point round, na nagresulta sa internal injuries.
“The damage was extensive internally, and bullet fragments were left inside her body,” ani Remulla.
