MANILA, Philippines – Itinuturing nang nagbitiw sa Philippine National Police (PNP) si Police General Nicolas Torre III matapos niyang tanggapin ang posisyon bilang general manager ng Metropolitan Manila Development Authority (MMDA), ayon kay Ralph Calinisan, vice chairman at CEO ng National Police Commission (Napolcom).
Ayon kay Calinisan, ang pagbibitiw ni Torre ay magbubukas ng daan para kay Police Lt. Gen. Jose Melencio C. Nartatez, Jr. na maging full-time PNP chief at makuha ang kanyang ika-apat na bituin.
“With the appointment of Torre to the MMDA, and his acceptance of the post, he has ipso facto resigned from the police force…This paves the way for General Jose Melencio Nartatez, Jr. to get his well-deserved four-star rank,” ani Calinisan.
Itinalaga si Torre bilang PNP chief noong Mayo ngunit tatlong buwan lamang ang kanyang panunungkulan dahil sa reorganization ng mga senior PNP officers, kabilang si Nartatez, na pansamantalang naalis bilang ikalawang pinakamataas na opisyal ng PNP upang pamunuan ang police forces sa Western Mindanao.
Dahil sa batas na lumikha sa PNP, isang apat na bituin lamang ang pinapayagang maglingkod sa puwesto bilang general sa PNP.
Noong nakaraang panahon, hindi pa makuha ni Nartatez ang kanyang ika-apat na bituin dahil itinuturing aktibo pa si Torre sa PNP.
Ayon kay Calinisan, ang bagong sitwasyon ay nagbibigay-linaw sa PNP, dahil si Nartatez ay nagkaroon na ng buong operational accountability at liderato sa loob ng ilang buwan.
“I am personally looking forward to the donning of the four-star rank to General Nartatez by the President. I commend General Nartatez for his exceptional leadership and unwavering commitment to professionalizing the PNP,” dagdag niya. RNT/MND
