MANILA, Philippines — Isinusulong ng mga senador ang mga panukalang magpapantay sa rank classification at compensation ng Bureau of Jail Management and Penology (BJMP) at Bureau of Fire Protection (BFP) sa Philippine National Police (PNP) at Armed Forces of the Philippines (AFP), bilang bahagi ng mas malawak na reporma upang palakasin ang mga institusyon ng public safety.
Tinalakay ang panukala sa pagdinig ng Senate Committee on Public Order and Dangerous Drugs noong Miyerkules na pinangunahan ni Senator JV Ejercito, kung saan pinag-usapan din ang mga hakbang upang ma-streamline ang jail management sa buong bansa.
Ayon kay Ejercito, layunin ng mga reporma na tugunan ang matagal nang problema sa detention system ng bansa, kabilang ang fragmentation, congestion, at inconsistent standards.
“We have long recognized the challenges of fragmentation, congestion, and inconsistent standards in the management of detention facilities across the country. These proposals aim to address these issues through a more streamlined and unified system for the entire country,” aniya.
Sa ilalim ng mga panukala, itataas ang ranggo at kompensasyon ng mga tauhan ng BJMP at BFP upang pumantay sa kanilang mga katapat sa pulisya at militar, bilang pagwawasto sa umiiral na pagkakaiba sa sistema.
Sinabi ni Senator Raffy Tulfo na sa pamamagitan ng panukala, maipapantay ang posisyon ng mga pinuno ng dalawang ahensya sa mga opisyal ng PNP at AFP.
Nakabatay ang panukala sa Republic Act 9263, na nagbigay-propesyonalisasyon sa BJMP at BFP, ngunit kailangan na umanong i-update upang umayon sa binagong rank structure ng PNP sa ilalim ng Republic Act 11200.
Sinabi ni Ejercito na nagpapatuloy ang konsultasyon sa mga local government unit, partikular sa mga panukalang ilipat sa pangangasiwa ng BJMP ang mga provincial at sub-provincial jail upang maging pare-pareho ang operasyon.
“Our objective is simple: to ensure that any reform we advance is not only well-intentioned but also practical, sustainable, and responsive to realities on the ground,” dagdag pa ng senador.
Layunin ng ipinanukalang jail integration na ilagay sa iisang chain of command ang lahat ng detention facility upang matugunan ang hindi pantay na pamamahala, kabilang ang hindi magkakatulad na resource allocation at rehabilitation programs.
Nagpahayag naman ng suporta si Department of the Interior and Local Government Undersecretary Serafin Barreto sa mga panukala, at sinabing makatutulong ang mga ito upang matugunan ang operational gaps at mapalakas ang public safety institutions.
Sinabi naman ni BFP officer-in-charge Wilberto Rico Neil Kwan Tiu na ang kasalukuyang rank system ng ahensya, na umiiral na sa loob ng mahigit tatlong dekada, ay hindi na angkop sa lawak at bigat ng kanilang tungkulin.
Nakasaad sa mga panukalang batas ang transition mechanism para sa jail integration, kabilang ang tatlong taong palugit para sa paglilipat ng mga pasilidad at tauhan, habang pinananatili ang job security ng mga maaapektuhang empleyado alinsunod sa qualification standards. RNT
