MANILA, Philippines – Panahon na para muling suriin ang panuntunan ng Senado kaugnay sa non-attendance o mahabang pagliban, ayon kay Senate President Pro Tempore Panfilo “Ping” Lacson.
Ito ay kaugnay sa mahabang pag-absent ni Senador Ronald “Bato” Dela Rosa na hanggang ngayon ay hindi pa rin pumapasok sa trabaho.
Maaaring maharap sa ethics complaint si Dela Rosa dahil sa pagliban nito, na ihahain ni dating Senador Antonio Trillanes IV.
Nang tanungin naman kung hindi parurusahan ng Senado si Dela Rosa, sagot ni Lacson: “It’s because there’s nothing in our rules. We have rules for continued absences in committees. They lose their membership in that committee. But, as far as the plenary, we don’t have a rule.”
“I think we should revisit the rules of the Senate to make amendments, to incorporate situations like that of Senator Bato,” dagdag pa niya.
Si Dela Rosa ay hindi na pumapasok sa trabaho sa Senado mula pa noong Nobyembre matapos igiit ni Ombudsman Jesus Crispin Remulla na mag-iisyu na ng warrant of arrest ang International Criminal Court (ICC) laban sa senador dahil sa kaugnayan nito sa war on drugs ni dating Pangulong Rodrigo Duterte.
Tumayong hepe ng Philippine National Police si Dela Rosa mula 2016 hanggang 2018.
Ayon naman kay Lacson kaugnay sa gagawin ng Senado sa napipintong ethics complaint na ihahain laban kay Dela Rosa, sinabi nito na, “We’re taking about what action to take in the case of Senator Dela Rosa, but there’s no consensus yet.”
“We’ll just cross the bridge when we get there,” dagdag pa.
Noong nakaraang linggo, napabilang si Dela Rosa, kasama sina Senador Christopher “Bong” Go na dating aide ni Duterte, at anim iba pa bilang co-perpetrators sa ICC case laban sa dating pangulo. RNT/JGC
