MANILA, Philippines – Isang “friendly fire” ang ikinamatay ni Police S/Sgt. Nelson Santiago sa isang anti-kidnapping operation kamakailan sa lalawigan ng Pampanga, inihayag ng Philippine National Police (PNP) nitong Lunes.
Sa press briefing sa Camp Crame, Quezon City, sinabi ni PNP spokesperson Col. Jean Fajardo na base ito sa resulta ng ballistics examination sa mga slug na narekober sa katawan ni Santiago.
Sinabi ni Fajardo na kinumpirma rin ng forensic investigation na unang tumama kay Chief M/Sgt. Eden Accad, sa kanyang katawan bago tumama kay Santiago.
“Mayroong tatlo silang pumasok sa isang madilim na lugar habang nasa operasyon. Nakita ng isang miyembro ng pasukan na nakatutok sa kanila ang baril at nagkataon, nabunot niya ang gatilyo at ang sugatang pulis (Santiago) ang unang natamaan,” dagdag niya.
Ang operasyon noong Agosto 3 sa Angeles City ay nagresulta sa pagsagip sa dalawang biktima at pagkakaaresto sa dalawang suspek. Nakaligtas si Accad habang si Santiago ay dead on arrival sa Angeles University Foundation Medical Center.
Sinabi ni Fajardo na malubhang nasugatan sina Accad at Santiago dahil wala silang suot na bulletproof vests sa operasyon.
Sinabi niya na ang pulis, na may ranggong Patrolman, na aksidenteng nakabaril kina Accad at Santiago, ay umamin sa kanyang pagkakamali at agad na isinuko ang baril.
“Na inquest na ito at sinampahan na siya ng kasong reckless imprudence resulting in homicide and serious physical injury at kasalukuyang nakakulong siya sa AKG (Anti-Kidnappping Group),” ani Fajardo.
Ipinag-utos na rin ni PNP chief Gen. Rommel Francisco Marbil ang pagrepaso sa police operational procedures kasunod ng insidente.
Idinagdag niya na siyam na tauhan ng pulisya na sangkot sa operasyon ang tinanggal sa kanilang mga puwesto habang nakabinbin ang imbestigasyon sa posibleng mga lapses ng operasyon.
Sa kanyang panig, sinabi ni PNP Internal Affairs Service (IAS) Inspector General Brigido Dulay na naglunsad na sila ng administrative investigation sa insidente.
Sinabi ni Dulay na aabutin ng 20 araw ang paunang imbestigasyon ng kaso.
“After that, there would be a formal charge and hearings will commence,” aniya pa.
Samantala, tiniyak naman ng IAS chief na mahaharap sa karampatang parusa ang mga mapatunayang mananagot. RNT
