DUMAGUETE, Philippines – Isang tourist police officer sa Dumaguete City ang namatay habang nasa post-duty therapeutic at exercise routine.
Ang 48-taong-gulang na pulis ay nakaranas ng hirap sa paghinga sa isang diving activity, gabi noong Agosto 5, 2025.
Dinala siya sa Holy Child Hospital ngunit doon ito binawian ng buhay.
Batay sa imbestigasyon ng pulisya, ang fun diving ay bahagi ng post-duty therapeutic at exercise routine na ginawa sa isang beachfront sa Barangay Calindagan.
Sinabi ng isang kasama ng pulis, na humiling na hindi magpakilala, na tumuloy sila sa bukana ng Ilog Banica. Ngunit nang makarating sila sa isang lugar na tinatayang nasa 15 talampakan hanggang 20 talampakan ang lalim, napansin ng isa pa nilang kasamahan na nagsimulang magsenyas ang pulis gamit ang flashflight. Ang palatandaang ito ay inilarawan bilang bahagi ng isang emergency na sitwasyon.
Nagpasya ang grupo na lumangoy pabalik sa dalampasigan.
Sinabing may malay ang pulis, ngunit nahihirapang huminga.
Sinalubong sila ng mga indibidwal na sakay ng pumpboat at mga tauhan ng Coast Guard upang tumulong sa pagbabalik sa dalampasigan.
Nagsagawa ng imbestigasyon upang matukoy ang mga pangyayari na humahantong sa pagkamatay ng pulis. RNT/MND
