DUMATING ang Lunes, at kasabay nito ang gulat sa jeepney, e-jeep at bus — biglang tumaas ang pamasahe ngayon!
Para sa ordinaryong jeepney, mula ₱13 ay naging ₱14 ang pamasahe sa unang apat na kilometro; ₱17 sa modern jeepney; ₱15 sa ordinaryong bus sa Metro Manila at ₱18 sa air-conditioned bus; dagdag ₱1 sa provincial bus; ₱20 dagdag sa base fare ng TNVS; at mula ₱75 ay naging ₱115 ang airport taxi.
Lahat ito ay inaprubahan ng LTFRB (Land Transportation Franchising and Regulatory Board), matapos ang ilang linggong pag-iwas ng Malacañang at Department of Transportation sa isyu.
Masakit ang dagdag-pasahe, lalo na sa manggagawa at estudyanteng kailangang maghanap ng ekstrang pera sa gitna ng pahirapang biyahe — impyernong trapiko, init, halumigmig o humidity, at ulang Habagat na bumabaha.
Dagdag-sakit ng ulo rin ang transport strike ng Manibela at Piston, na nagbantang ihihinto ang kanilang mga makina hanggang bukas.
Pero linawin muna natin kung bakit kinailangan ang fare hike ngayon. Nariyan ang digmaan sa Middle East, tensiyon sa pagitan ng US at Iran, at pandaigdigang suplay ng Langis — lahat tumatama sa Pilipinas na walang sariling langis at kailangang maghatid ng bawat patak sa mga isla.
Hindi rin natin masisisi ang mga kompanya ng langis. Kailangan nilang makipag-areglo, para gumulong ang mga delivery truck, tumakbo ang negosyo at may laman ang mga estante.
Pero ang ₱1 rollback bagama’t welcome, ay hindi nakapagliligtas sa mga kompanya ng langis sa batikos. Kita ng lahat kung gaano ito kaliit at paunti-unti — halos nakaiinsulto — matapos ang ₱8 kada litrong taas noong nakaraang linggo.
Samantala, ramdam ng mga Pilipino ang inflation at paghina ng piso na tumutusok sa badyet ng pamilya. Wala nang ligtas sa presyo — pagkain, gasolina, serbisyo, at pati pagbiyahe.
Kaya dapat ding isipin ng Manibela at Piston ang kalagayan ng publiko. Ang pagpaparalisa ng mga ruta habang nagtataas ang pamasahe ay hindi gobyerno ang pinaparusahan kundi ang mga commuter. Kapag pinahinto nila ang kanilang fleet, lalo lamang nilang pinapahirapan ang publiko — at kanilang pamilya.
Sa panig ng gobyerno, sinubukan nitong pigilan ang fare hike mula Marso at naglabas ng ₱2.5 bilyong fuel subsidy bago sumuko. Ngayon, kailangan nitong kumilos: mag-deploy ng emergency transport para sa stranded commuter at tapusin ang strike sa dayalogo — o gamitin ang ligal at franchise-enforcement powers ng LTFRB kung mabigo ang usapan.
Maaaring makatulong ang fare hike sa mga driver na hirap nang pagkasyahin ang kita sa gastusin. Makatwiran iyon. Pero hindi pwedeng dito magtapos ang Malacañang. Kailangang habulin din nito ang ibang presyong kumakain sa badyet ng mga pamilya.
Dahil habang napaiiling tayo sa taas ng gasolina at pamasahe, huwag nang magulat — ang dating ₱2 na pandesal ay tumaas na rin sa ₱5 bawat isa.
* * *
SHORT BURSTS. Para sa mga komento o reaksyon, mag-email sa [email protected] o mag-post sa @Side_View sa X app (dating Twitter).
