MANILA, Philippines – Pinangunahan ni Southern Police District (SPD) Director Brig. Gen. Manuel Abrugena ang turnover ceremony ng hepe ng kapulisan sa Lungsod ng Pasay nitong nakaraang Lunes, Marso 3.
Ayon kay Abrugena, pinalitan ni P/Col. Joselito De Sesto si outgoing police chief P/Col. Samuel Pabonita bilang bagong talagang city police office-in-charge ng lungsod.
Naganap ang palitan sa isang simpleng turnover ceremony na ginanap sa Mayor’s Office na matatagpuan sa ikalawang palapag ng Pasay City Hall na dinaluhan ni 1St District Councilor at tumatakbo bilang vice-mayor sa darating na halalan na si Mark Calixto na naging representante para humalili kay City Mayor Emi Calixto-Rubiano.
Pinasalamatan naman ni Abrugena si Pabonita sa kanyang dedikasyon sa pagseserbisyo at pamumuno bilang hepe ng kapulisan sa lungsod.
Samantala, naghayag naman ng kanyang buong tiwala si Abrugena kay De Sesto sa ipapakikitang prinsipyo sa pagtitiwala, kolaborasyon, at positibong transpormasyon ng bagong talagang police chief upang mapanatili ang legasiya ng kahusayan sa patuloy ng kanyang pagseserbisyo bilang hepe ng kapulisan. (James I. Catapusan)
