MANILA, Philippines – Sinabi ng Office of Civil Defense (OCD) nitong Martes na 13 katao ang naiulat na namatay dahil sa epekto ng Tropical Storm Enteng.
Sinabi ni OCD spokesperson Edgar Posadas sa isang panayam na walo sa mga nasawi ay naiulat sa Rizal, tatlo sa Bicol, at dalawa sa lalawigan ng Cebu.
“Meron pong dalawa sa Cebu. Ito po yung nabagsakan ng pader tapos yung isa pong pader na nakakabit sa bahay. Meron din tayong kinukumpirma, bina-validate together with our regional office of Bicol. Tatlo po yun. Meron din po dito sa Calabarzon, particular sa Rizal po, walo po ang kinukumpirma natin diyan. Karamihan po yung sa Antipolo po,” ani Posadas sa interbyu ng GMA News.
Nabanggit ni Posadas na bini-verify pa rin ng OCD ang mga ulat na ito.
Samantala, sinabi ni Posadas na 10 katao ang naiulat na nasugatan sa Cebu dahil sa Enteng.
Sa ngayon, nasa kabuuang 24,043 katao o 6,052 pamilya ang naapektuhan ng Enteng sa Bicol, gayundin sa Central at Eastern Visayas regions, ayon kay Posadas.
Anim na lugar ang nasa ilalim ng Tropical Cyclone Wind Signal (TCWS) No. 2 habang patuloy na gumagalaw ang Enteng sa ibabaw ng West Philippine Sea noong Martes ng umaga, sinabi ng state weather bureau PAGASA.
Namataan si Enteng sa baybayin ng Laoag City, Ilocos Norte, na kumikilos pakanluran hilagang-kanluran sa bilis na 20 kilometro bawat oras at taglay ang lakas ng hanging aabot sa 75 kph malapit sa gitna at pagbugsong aabot sa 115 kph.
Inaasahang lalabas si Enteng sa Philippine area of responsibility sa Miyerkules ng umaga. RNT
