MANILA, Philippines – Maaaring imbitahan sa Kamara si Pangulong Ferdinand “Bongbong” Marcos Jr. kung may makikitang batayan sa inihaing impeachment complaint laban sa kanya, ayon kay House Committee on Justice Chairman at Batangas Rep. Gerville Luistro.
Ayon kay Luistro, pagsasamahin muna ng komite ang dalawang impeachment complaint bago suriin kung pasado ito sa “substance and form” ng reklamo.
“Before we start, the complaints need to be consolidated because it is not possible for two complaints to be heard in the Justice committee,” paliwanag ni Luistro.
Aniya, pasok sa “sufficient in form” ang impeachment complaint kung ito ay “signed, verified at inendorso ng House member,” samantala “sufficient in substance” naman kapag ang mga alegasyon ay suportado ng ebidensya.
Sinabi ni Luistro na sa pagdetermine ng “substance and form,” tanging mga miyembro ng komite lamang ang makikilahok.
Kung papasa sa House justice panel ang impeachment complaint, saka pa lamang iimbitahan ng komite ang mga complainant at ang respondent na si Pangulong Marcos.
Ang unang reklamo ay inihain ni Atty. Andre de Jesus na inendorso ng Pusong Pinoy party-list, habang ang ikalawa ay inihain ng Makabayan Bloc sa Kamara na sina Rep. Antonio Tinio ng ACT Teachers, Sarah Elago ng Gabriela, at Rene Co ng Kabataan party-list.
Pangunahin na batayan sa impeachment ang alegasyon ng korapsyon sa flood control projects. Gail Mendoza
