MAY posibilidad na ipag-utos ng National Telecommunications Commission (NTC) na kinakailangang personal na pumunta sa mga kompanya ng telekomunikasyon para sa pagpaparehistro ng SIM o subscriber identity module card upang mapigilan ang mga indibidwal sa iligal na pagbebenta ng kanilang mga pagkakakilanlan.
Noong December 27, 2022, naging epektibo ang Implementasyon ng Republic Act No. 11934 o ang SIM Registration Act. Ayon sa NTC o National Telecommunications Commission, mandatory o kailangang irehistro ang mga SIM o subscriber identity module sa kani-kanilang telecommunications provider.
Ayon sa NTC, ang kasalukuyang online registration process ay nakatanggap ng batikos bilang isa sa mga dahilan ng pagdami ng text scams, kung saan may mga mapagsamantalang indibidwal na ginagamit ang sistema upang ibenta ang kanilang pagkakakilanlan sa iba.
Nangangamba ang ahensiya at ang mga kompanya ng telekomunikasyon sa laganap na pagbebenta ng mga pre-registered SIM cards, na maaaring gamitin sa pagpapakalat ng text scams.
Alinsunod sa Republic Act No. 11934, ang sinomang mapatunayang nagkasala sa krimeng ito ay maaaring makulong ng anim na buwan hanggang anim na taon at/o pagmultahin ng halagang mula Php 100,000 hanggang Php 300,000.
Nagpalabas ng memorandum ang NTC na nag-uutos sa mga kompanya ng telekomunikasyon na pagbutihin ang kanilang “mga sistema para sa SIM registration at magpatupad ng mga partikular na hakbang para mapatunayan ang pagiging lehitimo ng mga nairehistrong SIM.”
Noong 2024, nakapag-block ang mga TELCO ng mahigit 3.3 bilyon scam texts at nag-deactivate ng mahigit 3.1 milyon SIM cards na natuklasang konektado sa mga mapanlinlang na gawain.
Pagtitiyak ng NTC at mga TELCO, patuloy silang naghahanap ng iba’t ibang kaparaanan para tuluyang matigil ang modus operandi ng mga nagbebenta ng kanilang identidad na nagagamit sa pagrerehistro ng mga SIM card na ang pangunahing layunin ay manloko ng mga tao.
