MANILA, Philippines — Hindi medically required ang patuloy na pagkaka-confine sa ospital ni dating House Speaker Martin Romualdez dahil mababa ang panganib nitong magkaroon ng agarang heart attack, ayon sa independent medical evaluation ng Philippine General Hospital (PGH).
Ito ang sinabi ni PGH Medical Director Dr. Gerardo Legaspi sa kanyang pagtestigo nitong Lunes sa Sandiganbayan.
Batay sa pagsusuri ng PGH, mababa umano ang risk ni Romualdez para sa impending heart attack at hindi kinakailangan ang continued inpatient confinement para sa kanyang cardiac condition.
Dinala si Romualdez sa PGH mula Cardinal Santos Medical Center para sa independent medical assessment na iniutos ng Sandiganbayan matapos siyang maaresto kaugnay ng kasong plunder.
Nauna nang sinabi ng kanyang mga doktor sa Cardinal Santos na mayroon siyang ilang kondisyon kabilang ang hypertensive atherosclerotic cardiovascular disease, unstable angina, coronary artery disease, diabetes at hypertension.
Inaasahang pagbabatayan ng korte ang findings ng PGH sa pagpapasya kung maaari nang ilipat si Romualdez mula sa ospital patungo sa detention facility. RNT
