PISTON tigil-pasada tuloy sa ikalawang araw; magmamartsa sa Mendiola

MANILA, Philippines — Itutuloy ng Pinagkaisang Samahan ng mga Tsuper at Operator Nationwide (PISTON) ngayong Miyerkoles, Setyembre 30, ang ikalawang araw ng kanilang transport strike upang igiit sa pamahalaan ang mga panawagan kaugnay ng mataas na presyo ng produktong petrolyo.

Ayon sa grupo, magsasagawa muna ng mga pagkilos sa iba’t ibang strike centers ang mga tsuper at operator bago magtipon sa Welcome Rotonda alas-2 ng hapon at magmartsa patungong Mendiola sa Maynila.

Kabilang sa mga panawagan ng PISTON ang pagpapababa ng presyo ng diesel sa P55 kada litro, pag-aalis ng excise tax at value-added tax sa petroleum products, at pagpapawalang-bisa sa Oil Deregulation Law.

Sa Cubao, Quezon City, nagsagawa na ng programa ang ilang miyembro ng grupo sa kahabaan ng Aurora Boulevard nitong Miyerkoles ng umaga. Gayunman, may mga jeepney pa ring patuloy na bumibiyahe sa mga rutang Cubao-Divisoria at Cubao-Quiapo.

Isang miyembro ng PISTON na bumibiyahe sa rutang Cubao-Divisoria ang nagsabing handa siyang isakripisyo ang dalawang araw na kita upang maiparating ang kanilang hinaing sa gobyerno. Sinabi niyang P200 lamang ang kanyang kinita sa huli niyang araw ng pamamasada.

Nauna nang nagkabisa ang P1 dagdag-pasahe, dahilan upang maging P14 ang minimum fare sa traditional jeepneys. Ngunit iginiit ng PISTON na hindi sapat ang naturang dagdag at may nakabinbin itong petisyon para sa P10 fare increase.

Sinabi naman ng Land Transportation Franchising and Regulatory Board na maaari ring ikonsidera ang fare rollback kapag bumaba at naging matatag ang presyo ng langis at may maihahaing kaukulang petisyon.

Samantala, ilang paaralan at unibersidad ang nagsuspinde ng face-to-face classes dahil sa inaasahang epekto ng tigil-pasada sa transportasyon. Santi Celario