MANILA, Philippines – Itinakda ng Quezon City Regional Trial Court ang pre-trial ng mga kaso ng malversation at iba pang reklamo laban sa dating Department of Public Works and Highways (DPWH) engineers sa Abril 13, 2026, ayon sa Department of Justice (DOJ).
Ayon kay DOJ spokesperson Atty. Polo Martinez, tatlong hanay ng kaso—malversation, falsification, perjury, at graft—laban kina Brice Hernandez, Jaypee Mendoza, at iba pa, ang isinampa noong Enero at Pebrero sa Bulacan Regional Trial Court.
Ang mga kaso ay may kinalaman sa SYMS Construction projects sa Bulacan.
“Following Supreme Court Resolution A.M 25-10-24-SC, the cases were then transferred to RTC QC as a designated special court for corruption-related cases arising from anomalous flood control and infrastructure projects,” pahayag ni Martinez.
Idinagdag niya na dahil ang mga nasasakdal ay nasa ilalim ng Salary Grade 27, direktang isinampa ng DOJ ang mga kaso sa RTC matapos ang preliminary investigation.
Ipinabatid din ni Martinez na ang mga kaso laban kay dating Bulacan district engineer Henry Alcantara at SYMS Construction owner Sally Santos ay ibinaba matapos silang tanggapin bilang state witness.
“To clarify, by virtue of his admission as state witness by the WPP, Henry Alcantara was dropped as respondent and not included in the Information filed in court,” aniya.
Noong Enero, pormal nang idineklara ng DOJ na mga state witness sina Alcantara, Santos, dating DPWH undersecretary Roberto Bernardo, at engineer Gerard Opulence. RNT/MND
