MANILA, Philippines – Kinondena ng minority lawmakers sa Kamara ang anunsyo ng Malacañang tungkol sa mga “priority” bills, dahil hindi pa ito sertipikado bilang urgent ng Pangulo.
Ayon kay Deputy Minority Leader Leila de Lima at Assistant Minority Leader Perci Cendaña, hindi sapat ang pagtatalaga lamang sa Anti-Political Dynasty Bill at Independent People’s Commission (IPC/ICAIC) Bill bilang priority; kailangan itong i-certify bilang urgent.
“While we welcome the pronouncement from President Marcos Jr. about certain measures that he thinks Congress should prioritize, we remain disappointed that the proposed IPC/ICAIC Bill and Anti-Political Dynasty Bill were NOT certified as urgent,” ani De Lima.
“Para bang ang order ng taumbayan ay i-certify ang mga ito as urgent, pero ang inihain sa atin ay PR (press release) na priority bills naman daw ang mga ito. Kung totoong ipa-prioritize na lang din, bakit hindi pa itodo at totohanin na? Kahit parang sirang plaka na tayo, hindi tayo magsasawang kalampagin ang Pangulo na i-certify na ang mga ito as urgent, and for our colleagues to swiftly pass these measures,” dagdag pa ni De Lima.
Kung ma-certify bilang urgent, maiiwasan ng Kongreso ang tatlong araw na paghihintay sa pagitan ng second at third reading, na magpapabilis sa pagpasa ng mga panukala. RNT
