Home NATIONWIDE Propesyonalisasyon ng pagsasalin inihirit

Propesyonalisasyon ng pagsasalin inihirit

MANILA, Philippines- Sinisilip ng Komisyon ng Wikang Filipino (KWF) o ang Commission on the Filipino Language ang propesyonalisasyon ng pagsasalin sa gitna ng kakulangan ng job security para sa local translators.

Base sa KWF, nakikipag-ugnayan ito sa National Committee on Language and Translation (NLTC) ng National Commission for Culture and the Arts (NCAA), mga unibersidad at mga organisasyon upang isulong ang batas para sa regulasyon at propesyonalisasyon ng pagsasalin sa bansa.

“Kailangan pa siyang pag-usapan o iharap sa marami para makita kung ano ‘yung mas mainam o mas maayos na direksyon ng pagsulong ng panukalang batas para sa propesyonalisasyon ng pagsasalin,” pahayag ni KWF department head John Enrico Torralba sa ulat nitong Linggo.

Kasunod ito ng hinaing ng ilang local translators na wala silang seguridad sa trabaho at hindi binabayaran nang wasto para sa kanilang serbisyo.

“Una, hindi nababayaran sila nang tama. Tinitipid silang mga tagapagsalin, so parang hindi nakikita ‘yung halaga nila sa lipunan,” giit n dating KWF director General Roberto Añonuevo sa parehong ulat.

“‘Pag lumapit sila sa akin, magpapa-translate, tapos thank you o kaya swerte kung may mug o kaya may keychain na ibibigay sa’yo. Sila ang nagtatakda ng presyo samantalang sa kalakaran sa buong mundo, may mga rates ang translators,” pahayag naman ni Raquel Sison-Buban ng De La Salle University Salita. RNT/SA