ORIENTAL MINDORO, Philippines – Inaresto ng pulisya noong Sabado ang 61-anyos na Korean na wanted sa kanyang bansa dahil sa umano’y financial fraud sa isang operasyon sa Puerto Galera, Oriental Mindoro.
Ayon kay Jovencio S. Badua Jr., direktor ng Police Regional Office 4B, ang naaresto na si Hae Jung Chun ay may warrant of arrest mula sa Changwon District Court at Seoul Central District Court ng Republic of Korea dahil sa umano’y paglabag sa Foreign Exchange Transactions Act at Electronic Financial Transactions Act.
“He is also a subject of an Interpol Red Notice in relation to these cases,” ani Badua, at idinagdag na isinagawa ang pag-aresto matapos maglabas ng Warrant of Deportation ang Bureau of Immigration laban kay Hae.
Binigyang-diin ni Badua na ipinapakita ng operasyon ang pinaigting na koordinasyon ng mga ahensya at intelligence-driven efforts laban sa transnational crime.
“Let this serve as a clear warning: fugitives have no safe haven in Mimaropa, as we will relentlessly pursue those who evade justice and strengthen coordination with national agencies and international partners to ensure they are located, arrested, and properly processed,” aniya.
Sa ngayon, nasa kustodiya na si Hae ng Fugitive Search Unit ng Bureau of Immigration. RNT/MND
