MANILA, Philippines – Nilinaw ni Deputy Speaker Ronaldo Puno na walang naging pagpupulong sa pagitan niya at ng liderato ng Kamara kaugnay sa impeachment ni Vice President Sara Duterte.
Aniya, hindi totoo ang mga kumakalat na balita.
Sa pahayag nitong Martes, Marso 10, sinabi ni Puno na hindi siya nakipagkita at walang plano para sa National Unity Party (NUP) na makipagkita kay Speaker Faustino “Bojie” Dy III at Majority Leader Ferdinand Alexander Marcos para pag-usapan ang impeachment.
“Press reports regarding supposed meetings between the National Unity Party (NUP) and the Speaker or Majority Leader Sandro Marcos are not true,” ani Puno.
“The NUP has not had any talks with the House leadership regarding impeachment, projects, or anything related to such. There are likewise no such talks being planned,” dagdag pa niya.
Ayon kay Puno, anumang posisyon ng partido kaugnay sa impeachment “will be arrived at only after a discussion among its members and after carefully evaluating the evidence presented.”
“It will never be the result of any influence or pressure from anyone,” sinabi pa niya.
Noong Pebrero 25, naglabas ng pahayag ang NUP na pirmado ng secretary general nito na si Reginald Velasco, na nagsasabing hindi sila boboto pabor sa impeachment ni Duterte dahil wala silang nakitang bagong ebidensya na ipinresenta sa apat na reklamong inihain sa Kamara.
“Unless compelling new evidence emerges during the course of these hearings that fundamentally alters the factual basis for the impeachment complaint, the NUP will most likely not vote in favor of this measure. The Party will not pre-empt such proceedings and remains prepared to assess any new evidence presented in the course of the deliberations,” dagdag ng partido.
Sa kabila nito, sinabi ni party member at Senior Deputy Majority Leader Lorenz Defensor na hindi siya nasabihan tungkol sa pananaw ng partido at sinabing hindi mababago ang paniniwala niyang sinira ni Duterte ang tiwala ng publiko at dapat itong ma-impeach.
Naniniwala si Defensor na may matibay na ebidensyang magpapatunay na si Duterte ay nakagawa ng betrayal of public trust sa November 2024 livestream nito na magtatawag umano siya ng killer para patayin sina Pangulong Ferdinand Marcos Jr., First Lady Liza Araneta Marcos, at dating House Speaker Ferdinand Martin Romualdez.
Si Defensor ay miyembro ng 11-person prosecution team na binuo para sa unang set ng impeachment complaints laban kay Duterte.
Kalaunan ay sinabi ni Puno na ang mga miyembro ng NUP ay gagawa ng “conscience vote” kaugnay sa impeachment ni Duterte sa halip na gumawa ng isang unified stand dahil sa iba-ibang pananaw sa isyu. RNT/JGC
