MANILA, Philippines- Nananatili sa Pilipinas ang puganteng televangelist na si Apollo Quiboloy, base sa Department of the Interior and Local Government nitong Huwebes.
“Sinisiguro namin na talagang si Pastor Quiboloy hinahanap namin,” ani DILG Secretary Benhur Abalos.
“Sa aming report, lumalabas na nasa Pilipinas po ho si Pastor Quiboloy… sa report na ibinigay sa akin,” patuloy ng opisyal.
Inihayag niya ito matapos isiwalat ng isang senador na tumakas na ng Pilipinas ang isa pang kontrobesyal na indibidwal na si dismissed Bamban, Tarlac Mayor Alice Guo, noong nakaraang buwan.
Nahaharap si Guo sa mga akusasyong pangangasiwa umano ng operasyon ng isang illegal gambling hub sa kanyang bayan. Ipinag-utos ng Senado na arestuhin siya sa pagtanggi niyang dumalo sa mga pagdinig nito.
Nakaditene naman ang dalawang kasamahan ni Guo sa Indonesia, batay sa mga awtoridad nitong Huwebes.
Samantala, pinaniniwalaang nagtatago si Quiboloy sa loob ng 30-ektaryang compound ng kanyang religious group sa Davao City.
Inaakusahan si Quiboloy ng sexual abuse at human trafficking, kung saan mayroong P10 milyong pabuyang alok para sa kanyang pagkakahuli. RNT/SA
