MANILA, Philippines – Tinitingnan ng Philippine National Police (PNP) ang nationwide adoption ng rapid alert system para mapabilis ang pag-uulat at pagtugon sa mga emergency sa mga paaralan.
Ayon kay PNP chief Gen. Jose Melencio Nartatez Jr., pinag-aaralan ng PNP ang institutionalization ng “Build Partnership. Early Detection. Swift Alert. Tactical Response” (B.E.S.T.) School Alert and Rapid Response System.
Technology-based ang platform na binuo ng PNP Calabarzon at nagbibigay-daan sa mga paaralan, pulisya at lokal na stakeholders na mabilis na mag-ulat ng insidente, magbahagi ng impormasyon at mag-coordinate ng response.
“Technology is a critical aspect of our security and law enforcement, and our personnel must have access to modern facilities and training innovations to improve our security systems,” ani Nartatez.
Sa pilot program sa Calabarzon, nasa 155 paaralan ang inaasahang gagamit ng application bilang bahagi ng organisadong alert at response mechanism.
Posible ring makipag-ugnayan ang PNP sa Department of Information and Communications Technology (DICT) para mapaunlad at mapanatili ang platform kung ipatutupad ito sa buong bansa.
“We have skilled police experts, and we are also equipped with advanced technology that can help us elevate our emergency response techniques,” ani Nartatez.
“Now is the time to utilize them properly,” dagdag niya.
Nauna nang sinabi ni Interior Secretary Jonvic Remulla na pinag-aaralan din ng DILG, kasama ang PNP, ang pagbuo ng quick reaction teams na tutugon sa emergencies sa mga paaralan.
Ang hakbang ay kasunod ng mga insidente sa mga paaralan, kabilang ang Banga National High School shooting noong Setyembre 18 kung saan tatlong menor de edad ang nasawi. RNT/MDS
