MANILA, Philippines – Tiniyak ni Interior Secretary Jonvic Remulla na handa ang Philippine National Police (PNP) sa pagharap sa mga kilos-protesta kaugnay ng anomalya sa flood control projects.
Sa paglulunsad ng Unified 911 Systems sa Maynila, sinabi niya na nagsagawa na ng command conferences at contingency planning ang DILG at PNP upang matiyak na mananatiling mapayapa ang mga pagtitipon.
“Our directive to the police is to be present, patient, and to practice maximum tolerance while respecting the sentiments of the people,” ani Remulla, at binigyang-diin na hindi haharangan ang mga may permit basta’t hindi magdudulot ng kaguluhan.
Pinawi rin niya ang pangamba na mauuwi ito sa kaguluhan tulad ng sa Indonesia at Nepal: “Even at our worst, we do not burn down places. I believe it will not come to that.”
Dagdag ni PNP acting chief Lt. Gen. Jose Melencio Nartatez Jr., nakalatag na ang mga security plan at may koordinasyon na sa iba’t ibang yunit sa buong bansa upang maiwasan ang karahasan. Santi Celario
