MANILA, Philippines – Pinakilos na ni Justice Secretary Jesus Crispin Remulla ang National Bureau of Investigation (NBI) hinggil sa mga bomb threat na sunod-sunod na ipinadadala sa ilang government agencies at mga local government units.
Nabatid na ang hindi beripikado na e-mail account ay mula sa nagpakilalang sender na Takahiro Karasawa, isa umanong Japanese lawyer mula sa umano’y “Steadiness Law Office”. Nagpakilala ang e-mail sender na isang maalam sa paggawa ng bomba.
Nakasaad sa e-mail ni Karasawa na sunod-sunod na bomba ang yayanig sa mga ahensya ng gobyerno ngayong Pebrero 12, 2024.
“There should be no place for pranks or spreading fear among our people. Let this be a warning to those behind this that we will not tolerate such acts and we will go after you with the full extent of the law,” babala ni Remulla.
Inatasan ng kalihim ang NBI na isumite sa kanya sa lalong madaling panahon ang resulta ng imbestigasyon. Teresa Tavares
