MANILA, Philippines – Nilinaw ni House Majority Leader Sandro Marcos na ang paglalaan ng pondo para sa DPWH projects ay nasa hurisdiksyon ng executive branch, hindi ng Kongreso.
“Number one, that was an initiative of the executive, meaning wala po kinalaman ang congressman, wala po kinalaman ang legislative sa pag-allocate na kahit ano man na amount doon,” ani Marcos, tugon sa ulat ng PCIJ tungkol sa malaking DPWH project funds sa kanyang distrito at sa distrito ng dating House Speaker Martin Romualdez.
Paliwanag niya, ang National Expenditure Program (NEP) mula sa Malacañang ang batayan ng General Appropriations Bill (GAB), at sa Kongreso nakasalalay ang pagsusuri nito, pero hindi direkta nakakaapekto sa allocation ng bawat proyekto ang mga mambabatas.
“Bilang isang mababatas… my mayors, my constituents, my barangay captains come to me with priority projects all the time and it is my job to forward those projects where necessary. But it is the prerogative of the executive as to where those funds go when the NEP arrives into congress,” dagdag ni Marcos.
Tinalakay rin niya na ang budget ng 2026 na nagkakahalaga ng P6.793 trillion ay walang discretionary funds o pork, at bawat proyekto ay naka-line item at maayos ang accounting.
“When you look at the budget po, line item po yan per amount basis. So it is projects that are accounted for. So that’s what I will say in that regard,” ani Marcos.
Itinuring din niyang isa sa pinaka-transparent na budget hearings sa kasaysayan ng Kongreso ang 2026 national budget, kabilang ang livestreamed Bicameral Conference Committee hearings. RNT/MND
