MANILA, Philippines — Humihingi ng paliwanag si Samar 2nd District Rep. Reynolds Michael T. Tan sa Department of Justice (DOJ) hinggil sa paghawak nito sa mga matagal nang nakabinbing Petitions for Review (PetRevs) at Motions for Reconsideration (MRs).
Sinabi ni Tan, na miyembro ng House Committee on Justice, na pinag-aaralan niyang magsulong ng congressional inquiry upang matingnan ang estado at proseso ng pagresolba sa mga nakabinbing PetRevs at MRs.
Nag-ugat ang kanyang interes sa usapin matapos makatanggap ng liham mula sa pamilya ni Enrique Manas Sr., isang magsasakang napatay sa ambush sa Sta. Margarita, Samar noong 2017.
Sumulat si Tan kay Justice Secretary Fredderick A. Vida upang humingi ng paglilinaw sa status at procedural history ng nakabinbing MR kaugnay ng Manas case, gayundin sa mga mekanismo ng DOJ sa paghawak ng mga kasong matagal nang sumasailalim sa departmental review. Si Vida ang kasalukuyang nakalista ng DOJ bilang Secretary of Justice.
Sinabi ng mambabatas na nais muna niyang makuha ang opisyal na paliwanag at pananaw ng DOJ bago magpatuloy sa anumang legislative inquiry.
Binigyang-diin din niya na anumang hakbang ng Kongreso ay dapat isagawa nang may paggalang sa independiyenteng pagsusuri ng DOJ at sa mga karapatan ng lahat ng panig.
Ayon kay Tan, layunin ng posibleng inquiry na matukoy kung sapat ang umiiral na sistema upang matiyak na naihahatid ang hustisya nang patas at sa loob ng makatwirang panahon.
Nag-ugat ang Manas case sa ambush noong Hulyo 23, 2017 sa Sta. Margarita, Samar na ikinamatay ni Manas.
Noong 2019, inirekomenda ng National Prosecution Service ang pagsasampa ng kaso laban kay dating military colonel Emilio Zosa at iba pang respondents. Naglabas naman ang Regional Trial Court ng warrant of arrest noong 2021 bago binaligtad ni dating DOJ Undersecretary Adrian Sugay ang naunang disposition noong Disyembre ng parehong taon.
Noong Enero 16, 2025, binaligtad naman ni dating Justice Secretary Jesus Crispin Remulla ang disposition ni Sugay at iniutos ang pagsasampa ng criminal charges.
Kasunod nito, isinampa ng DOJ ang criminal information laban kay Zosa at sa kanyang mga kapwa akusado, na natanggap ng Regional Trial Court noong Marso 19, 2026.
Kalaunan ay naghain si Zosa ng motion for reconsideration sa DOJ kaugnay ng resolusyong nag-utos ng kanyang prosecution. Wala pang pampublikong inilalabas na pinal na resolusyon ang DOJ sa naturang MR batay sa pinakahuling ulat tungkol sa usapin.
Nilinaw ni Tan na higit pa sa partikular na Manas case ang nais niyang matingnan at nais niyang malaman kung may mas malawak na usapin sa sistema ng pagresolba ng matagal nang nakabinbing PetRevs at MRs sa DOJ.
Ang pagsasampa ng criminal information ay hindi katumbas ng hatol, at ang pananagutang kriminal ng mga akusado ay kinakailangang mapatunayan sa hukuman alinsunod sa due process. RNT
