MANILA, Philippines — Ipinahayag ni retired general Hermogenes Esperon Jr. ang kanyang suporta sa 18 indibidwal na nagpakilalang dating Marines at nagsabing naghatid umano sila ng mga maleta ng pera sa ilang pulitiko sa utos ng nagbitiw na Ako Bikol representative na si Zaldy Co.
Dumalo si Esperon sa isang press conference kasama ang ilan sa mga naturang indibidwal at hinikayat ang mga awtoridad na imbestigahan ang kanilang mga pahayag.
“Full support ako sa kanilang pagsasabi at full support din ako sa kailangan na pag- imbestiga. ‘Wag natin hayaan na hanggang doon na lang, kailangang imbestigahan kasi napakaraming lead na binigay nila,” ani Esperon sa mga mamamahayag.
“Sobrang kaligayahan ko at nakausap ko ang magigiting na Marines, talaga namang dapat silang ikarangal…Palagay ko dapat lang na pakinggan natin sila, meron silang sinasabi. Tignan natin kung nagsasabi sila ng totoo, imbestigahan, hindi yung sasabihin na walang kwentang tao ‘yan,” dagdag pa niya.
Ayon sa ulat, 11 lamang sa 18 na nagpakilalang dating Marines ang dumalo sa press conference dahil sa umano’y mga alalahanin sa seguridad.
Sa naturang press conference, binatikos ni Rodante Ordillo, na nagpakilalang dating bodyguard ni Co, sina Antonio Trillanes IV at Jesus Crispin Remulla dahil sa umano’y magkakasalungat na pahayag kaugnay ng kanilang pakikipagpulong sa mga imbestigador ng International Criminal Court.
Nauna nang sinabi ni Remulla na nakipagpulong siya sa mga tauhan ng ICC upang talakayin ang proteksyon ng mga Pilipinong testigo sa kasong crimes against humanity laban kay dating pangulong Rodrigo Duterte.
Iginiit ng mga dumalo sa press conference na walang kinalaman sa pulitika ang kanilang mga pahayag at hiniling sa publiko na pakinggan sila sa halip na siraan o pilitin.
Ayon sa kanila, may ilang kasamahan umano silang nakakita kay Trillanes na nakikipagpulong sa mga imbestigador ng ICC, habang ang iba naman ay nagsabing naghatid sila ng mga paper bag sa dating mambabatas dahil sa magkakaibang tungkulin.
Sinabi rin nilang may mga pagkakataong naghatid sila ng paper bags sa isang bahay malapit sa lawa sa Paoay, Ilocos Norte, ngunit wala silang ibinigay na karagdagang detalye.
Inihayag din nila na noong 2025 ay nakita umano nila si Leila de Lima na lumalabas sa isang townhouse sa Forbes Park habang may dalang paper bag.
Dumalo rin sa press conference si dating kinatawan Mike Defensor, habang wala naman ang abogadong si Levito Baligod na naunang tumulong sa grupo.
Maaga ring tinapos ang press conference dahil sa umano’y mga alalahanin sa seguridad.
Nauna nang inakusahan ng 18 indibidwal ang ilang personalidad na umano’y tumanggap ng pera mula kay Co at sinabing pinadali umano ni Trillanes ang pagpasok ng hindi bababa sa limang imbestigador ng ICC at nakatanggap umano ng $2 milyon mula kay Co para sa imbestigasyon ng ICC.
Itinanggi ng mga nabanggit na opisyal at personalidad ang mga akusasyon. Sinabi rin ng Philippine Navy na apat sa 18 indibidwal ay hindi kailanman naging miyembro ng Navy o ng Philippine Marine Corps.
Binatikos din ni Vicente Blanco III ang pagkakasangkot ng kanilang mga dating miyembro sa naturang press conference. Santi Celario
