MANILA, Philippines – Iginiit ng depensa ni dating Senador Bong Revilla na nabigo sa ngayon ang prosekusyon na maiugnay siya sa umano’y mga iregularidad sa flood control project sa Pandi, Bulacan, kasabay ng pormal na pagbubukas ng kanyang pagdinig sa piyansa kaugnay ng kasong malversation noong Abril 6 sa Sandiganbayan.
Ayon kay Atty. Reody Anthony Balisi, isa sa mga abogado ng senador, ang mga paunang testimonya ng mga saksi ay sumusuporta sa posisyon ng depensa na walang partisipasyon ang dating senador sa umano’y “ghost” flood control project.
Sinabi ni Balisi na sa unang araw ng pagdinig ay dalawang saksi ang humarap, kabilang ang kinatawan mula sa National Bureau of Investigation (NBI) at isang project coordination officer mula sa Department of Public Works and Highways (DPWH) First District Engineering Office ng Bulacan.
Batay sa depensa, kapwa ipinahiwatig ng dalawang testimonya na walang kinalaman si Revilla sa alinman sa procurement o implementasyon ng nasabing proyekto.
Idinagdag ng abogado na tinalakay rin sa pagdinig ang estado ng proyekto, kung saan may testimonya na nagsasabing may naganap na konstruksiyon, na sumasalungat sa pahayag na ito ay ganap na hindi umiiral.
Gayunman, binigyang-diin ng depensa na mas mahalagang usapin ang kawalan ng ebidensiyang direktang nag-uugnay kay Revilla sa mga sinasabing iregularidad.
Inaasahang tatagal ng 10 araw ang pagdinig sa piyansa, kung saan nakatakdang magharap ang prosekusyon ng hanggang 20 saksi. Kabilang sa mga inaasahang tumestigo ay mga state witness, kabilang ang isang dating opisyal ng gobyerno na maaaring maging mahalaga sa kaso.
Kinilala ng depensa na maaaring magkaroon ng direktang paghamon sa mga salaysay ng mga saksi, lalo na kapag naihain na ang judicial affidavits.
Sa kabila ng inaasahang haba ng pagdinig, nagpahayag ng kumpiyansa ang depensa na nananatiling mahina ang kaso ng prosekusyon. Muli nilang iginiit na wala pang naipapakitang dokumentaryo o testimonial na ebidensiya na magpapatunay ng pagkakasangkot ni Revilla sa umano’y “ghost project.”
Magpapatuloy ang pagdinig sa mga susunod na araw habang kapwa naghaharap ng karagdagang ebidensiya at mga saksi ang magkabilang panig kaugnay ng umano’y P92.8-milyong ghost flood control project sa Pandi, Bulacan. RNT
