MANILA, Philippines – NAGLAAN ang administrasyong Marcos ng P10 bilyon sa ilalim ng National Expenditure Program (NEP) para sa ”The Rice for All Program” ng Department of Agriculture (DA).
Kabilang sa nasabing programa ang proyektong Benteng Bigas Meron Na ng administrasyon, pinapayagan ang pagbebenta ng P20 kada kilo ng bigas lalo na sa vulnerable sector.
“The P10 billion budget seeks to expand access to affordable rice from both importers and local traders at public markets and KADIWA sites,” ang sinabi ng Pangulo sa kanyang budget message.
Sa ilalim ng NEP, tinaasan din ang budget ng National Rice Program (NRP) ng DA, mayroon na itong P29.9 bilyon, tumaas ng 37.8% mula sa P21.7 bilyon budget noong 2025.
Sa pamamagitan ng NRP, magbibigay ang DA ng fertilizers sa pamamagitan ng Fertilizer Assistance Program nito na may ‘quality inbred at hybrid rice seeds’ na makatutulong sa mga lokal na magsasaka na palakasin ang ani ng kanilang pananim.
Idagdag pa rito, P30 bilyon naman ang inilaan sa Rice Competitiveness Enhancement Fund (RCEF) para pondohan ang modernisasyon ng ‘farm machinery at equipment; development ng rice seeds; pagpapalawak sa credit assistance; at probisyon ng rice extension service, bukod sa iba pa.
Naglaan naman ng P11.2 bilyon para sa Buffer Stocking Program, gagamitin ito para pambili ng 300,000 metric tons ng palay, na gagamitin sa panahon ng krisis gaya ng emergencies at sakuna.
“A total of P256.5 billion will be used to strengthen the Agriculture sector in 2026,” ang sinabi ng Pangulo.
Sa nasabing halaga, P153.9 bilyon ang itutustos sa DA at sa attached agencies nito; P45.1 bilyon para sa National Irrigation Administration (NIA), at P17.4 bilyon para sa Department of Agrarian Reform (DAR), bukod sa iba pa. Kris Jose
