ILOCOS SUR- Sinalubong ng kamatayan ang isang 40-anyos na lalaki matapos bumangga ang minamaneho nitong motorsiklo sa concrete fence ng isang residential house sa Brgy. Jardin, Tagudin ng lalawigang ito kahapon, Nobyembre 24.
Kinilala ng Tagudin Municipal Police Station ang driver ng Sym 110 motorcycle na si Clifford Quijano y Lemi, walang asawa, residente ng Brgy. Las-ud ng naturang bayan.
Nabatid na ang motorsiklo ay bumibiyahe papuntang silangang direksyon sa barangay road ng naturang lugar.
Pagdating nito sa pakurbang parte ng kalsada, ang motorsiklo ay lumihis o napunta sa kabilang lane hanggang sa bumangga sa sementadong bakod ng isang bahay.
Dahil dito, ang driver ng motorsiklo ay nagtamo ng mga sugat sa kanyang ulo na agad na isinugod sa ospital ng mga rumespondeng MDRRMO-Tagudin personnel.
Gayunman, ang biktima ay idineklarang dead-on-arrival ng umatending doktor. Rolando S. Gamoso
