MANILA, Philippines – Itinuturing ng defense team ni Vice President Sara Duterte na sarado na ang usapin ng impeachment case matapos ang pagresolba ng Korte Suprema sa mga isyung ipinupukol ng Kamara.
Sa pahayag ng kampo ng Pangalawang Pangulo, kinikilala nila ang naging desisyon ng Korte Suprema na tanggihan ang Motion for Reconsideration na isinampa ng Kamara.
Pinasasalamatan din nila ang Kataas-taasang Hukuman sa desisyong nagbibigay ng malinaw at authoritative guidance ukol sa mga constitutional limits at tamang pagtrato sa mga impeachment proceedings.
“We thank the Honorable Court for a ruling that now definitively lays down clear and authoritative guidance on the constitutional limits and proper treatment of impeachment proceedings,” ani nila.
Sa ruling ng Korte Suprema, pinagtibay nito ang naunang deklarasyon na labag sa Saligang Batas o unconstitutional ang impeachment complaint ng Kamara laban kay VP Sara dahil sa one-year ban rule ng Articles of Impeachment.
Nakasaad din sa resolusyon na anumang ihahayag na motion for reconsideration o pleadings ay hindi na papayagan ng Korte Suprema.
Dagdag pa ng kampo, dapat nang magpatuloy ang lahat upang tugunan ang iba pang mahahalagang suliranin ng bansa.
“With these issues settled by the Court, the matter is now closed. We should then move on to address the nation’s other pressing concerns,” bahagi ng pahayag ng defense team ni VP Sara.
