MANILA, Philippines – Nasa pangangalaga o sa ilalim ng ilalim ng protective custody ng International Criminal Court (ICC) si Edgar Matobato, isang self-confessed hitman para sa umano’y Davao Death Squad, ani dating senador Leila de Lima.
Dagdag pa ng dating solon na umalis ng Pilipinas si Matobato sa ilalim ng pekeng pagkakakilanlan matapos suriin ng ICC ang kanyang testimonya.
“Nakipag-ugnayan na siya, na-vetted, at nakapanayam ng ICC. He is now under their protective custody,” ani De Lima.
Sa kabilang banda, sinabi ng Malacañang na wala itong kumpirmasyon tungkol sa pag-alis o pagkakasangkot ni Matobato sa ICC.
“Wala kaming koneksyon kay Mr. Matobato at hindi namin makumpirma ang kanyang mga aksyon o desisyon,” ani Executive Secretary Lucas Bersamin sa isang briefing ng Palasyo.
Inihayag ni Matobato sa kanyang panayam sa New York Times na umalis siya ng bansa kasama ang kanyang asawa at mga stepchildren gamit ang mga pekeng pagkakakilanlan.
Idinagdag ni Bersamin na ang Palasyo ay hindi hinihikayat o pinipigilan ang mga aksyon ni Matobato, na binibigyang-diin na wala itong kontrol sa kanyang mga pagpipilian o sa kanyang desisyon na tumestigo sa ibang lugar. RNT
