MANILA, Philippines- Nakatakdang simulan ang imbestigasyon ng Senado sa madugong drug war ng dating administrasyong Duterte sa oktubre 28, 2024 habang naka-recess ang Kongreso, ayon kay Senador Aquilino “Koko” Pimentel III.
Sinabi ni Pimentel, vice chairman ng Senate Blue Ribbon Committee na ilan sa naimbitahan sa pagdinig sina dating Pangulong Rodrigo Duterte, retired Police Colonel Royina Garma, dating National Police Commission commissioner Edilberto Leonardo, dating Senator Leila de Lima, Kerwin Espinosa, at halos lahat ng pamilya ng drug war victims.
Sinabi ni Pimentel na kailangang bilisan ang imbestigasyon dahil nakatakdang isalang ng Senado sa debate sa plenaryo ang panukalang pambansang badyet sa 2025 na magsisimula sa Nobyembre 4.
Idinagdag pa ng senador na kahit may panawagan kina Senador Bong Go at Ronald “Bato” dela Rosa — kapwa mahigpit na kaalyado ni Duterte — na sumailalim sa indefinite leave sa harap ng Senate investigation na “[T]heir presence should not affect the credibility of the probe.”
“They are not going to preside. And we have to encourage other senators to show interest in the probe,” aniya.
Ibinasura rin ni Pimentel ang ipinalutang na ideya na magkaroon ng bicameral probe ang Kamara at Senado para sa joint investigation sa drug war.
“Good idea but very hard to implement because of scheduling problem,” giit ni Pimentel.
Nagsagawa ng imbestigasyon ang House Quad Committee sa drug war ni Duterte na pinangunahan ni Dela Rosa bilang hepe ng Philippine National Police (PNP) kaya nadawit senador.
Samantala, inihayag naman ni Senador Pia Cayetano, chairman ng Blue Ribbon Committee na ipinaubaya kay Pimentel ang daloy ng imbestigasyon dahil dumadalo ito sa energy summit sa Singapore na may kinalaman sa pagiging chairman nito ng Senate committee on energy.
“The issue of illegal drugs and the efforts of the past and present administration to curb its proliferation is a matter of great importance to our people, especially among families who have been victims of the evils it has caused,” ani Cayetano
Pangunahing responsibilidad ng Blue Ribbon Committee ang pagsisiyasat ng mga paratang ng katiwalian, maling pag-uugali, at iba pang mga iregularidad na kinasasangkutan ng mga pampublikong opisyal at ahensya ng gobyerno.
Pero ayon kay Cayetano, si Pimentel na chair ng Senate Committee on Justice ang mamumuno sa pagdinig dahil kinakailangan ang agarang aksyon.
“Since I am currently attending a summit on Energy for the Energy Committee, which I also chair, it has been agreed that Senator Pimentel will preside over the hearings,” aniya.
Ang imbestigasyon ay kasabay ng mga pagdinig sa House of Representatives sa EJK kung saan tinalakay ang lahat ng testimonya ng pamilya ng mga biktima, law enforcement officials, at human rights advocates.
Sa pagsusuri ng parehong kamara ng Kongreso sa isyu, positibo si Cayetano na magkakaroon ng masusing talakayan at solusyon upang maiwasan ang pang-aabuso sa hinaharap.
“The Blue Ribbon Committee will give it the attention it deserves,” wika niya. Ernie Reyes
