MANILA, Philippines — Positibong tinanggap ni House Committee on Public Accounts chairperson Terry Ridon ng Bicol Saro Party-list ang anunsyo ni Senate President Alan Peter Cayetano na pormal na magtitipon bilang impeachment court ang Senado sa Mayo 18.
Si Ridon ay kabilang sa 11 miyembro ng House prosecution panel na inatasang magpresenta ng articles of impeachment at mga ebidensya laban kay Vice President Sara Duterte sa Senado.
Sa isang pahayag, sinabi ni Ridon na malugod na tinanggap ng buong House prosecution panel ang hakbang ng Senado na magtipon bilang impeachment court.
Aniya, inaasahang dadalo ang buong prosecution panel sa pagbubukas ng impeachment court.
Ayon sa Konstitusyon, obligadong magtipon agad ang Senado bilang impeachment court sa sandaling matanggap nito ang articles of impeachment mula sa Kamara.
Isinumite ng Kamara ang Articles of Impeachment sa Senado noong Miyerkules ng gabi, dalawang araw matapos bumoto ang 257 mambabatas pabor sa impeachment ni Duterte, habang 25 ang tumutol at siyam ang nag-abstain.
Ang 11-kataong prosecution team ay binubuo ng mga lawyer-lawmaker, dating prosecutor, beteranong litigators, at mga senior House leaders mula sa majority at minority blocs.
Nauna nang tinawag ng mga lider ng Kamara ang panel na isang “powerhouse” team na inatasang iharap ang kaso nang may propesyonalismo at pagsunod sa due process.
Kabilang sa mga akusasyon sa Articles of Impeachment ang umano’y maling paggamit ng PHP612.5 milyong confidential funds, unexplained wealth, bribery sa mga opisyal ng Department of Education, at grave threats laban kay Pangulong Ferdinand Marcos Jr., First Lady Liza Araneta-Marcos, at dating Speaker Martin Romualdez.
