MANILA, Philippines – Ipinakilala ng Department of Science and Technology (DOST) ang Swift Emergency Response Vehicle Integration System with Smart Traffic and Electronic Enforcer on the Road (sERVis-STEER) para mapabilis ang pagtugon ng mga emergency response vehicles (ERVs) sa oras ng sakuna.
Binuo ito ng DOST–Advanced Science and Technology Institute (DOST-ASTI) at gumagamit ng Vehicle-to-Everything (V2X) wireless technology na nagbibigay-daan sa direktang komunikasyon ng mga ERV sa traffic systems at roadside units.
Sa pamamagitan ng teknolohiyang ito, maaari nang i-automate ang ruta ng sasakyan ng mga rescuer at mag-trigger ng “intelligent green lights” upang mas mabilis silang makadaan sa mga intersection.
Ayon kay DOST Secretary Renato U. Solidum Jr., mahalaga ang kooperasyon ng mga local government units (LGUs) at mga ahensya upang maging epektibo ang sistema.
“We need a full partnership of our local government units, partner agencies, and all of you to bring the same sense of urgency that our emergency responders bring to the road every day. DOST has always believed that science is most meaningful when it reaches the people who need it most,” aniya.
Bahagi rin ng proyekto ang Emergency Response Information Exchange Server Platform, isang centralized system para sa real-time monitoring ng mga ahensya, ospital, at dispatch centers.
Ang sERVis-STEER ay bahagi ng mas malawak na Intelligent Transportation System (ITS) ng bansa na nakatuon sa road safety, emergency response, at mas maayos na traffic management. RNT/MND
