MANILA, Phlippines – Maaaring imbestigahan ng Energy Regulatory Commission (ERC) ang Solar Para sa Bayan (SPBC), isang solar company na konektado kay Batangas Rep. Leandre Leviste, dahil sa umano’y labis na singil sa kuryente sa Occidental Mindoro.
Sumisingil umano ang SPBC ng hanggang ₱18 kada kilowatt-hour sa Paluan noong 2020—mga singil na hindi aprubado ng ERC.
Binigyang-diin ni ERC Chairperson Atty. Francis Saturnino Juan na dapat kumuha ng ERC approval ang mga regulated energy firm bago magpataw ng singil.
“Regulated energy firms must charge reasonable rates approved by the commission and comply with ERC and Department of Energy regulations,” ani Juan.
Ipinangako ng SPBC na magbibigay ng abot-kayang kuryente sa mga liblib na komunidad, ngunit ipinakita ng liham ng Occidental Mindoro Electric Cooperative noong 2020 na ang singil ay lampas ₱8 kada kWh sa halip na ₱3 kada kWh na ipinangako.
“He is accountable under our rules. Of course, he is also responsible under the provisions of the franchise law itself, because he would be in violation if it is proven that he operated and charged rates without ERC approval,” ani Juan.
Hindi direktang tinugon ni Leviste ang mga tanong tungkol sa hindi aprubadong singil, ngunit sinabi niyang ang ₱8–₱11.85 kada kWh ay kinakailangan upang mabawi ang mga pagkalugi habang hinihintay ang implementing rules and regulations (IRR) ng franchise.
Pinasara ang planta matapos makaranas ng ₱500 milyong pagkalugi. Ipinaliwanag ni Juan na bagamat hindi kailangan ng IRR para sa umiiral na operasyon, kinakailangan pa rin ng ERC approval para sa anumang pagtaas ng singil. Dave Baluyot
