MANILA, Philippines- Isinulong ni Pangulong Ferdinand “Bongbong” Marcos Jr. nitong Huwebes ang mas malakas na Mindanao sa gitna ng panawagang ihiwalay ang rehiyon mula sa Pilipinas.
”A stronger BARMM means a stronger Mindanao. A stronger Mindanao means a stronger Philippines bringing us closer to achieving our agendas,” bahagi ng talumpati ni Marcos sa 17th meeting of the national government – Bangsamoro government Intergovernmental Relations Body (IGRB) sa Pasay City.
Binigyang-diin niya na hindi kumpleto ang Bagong Pilipinas nang wala ang progresibong Bangsamoro region.
Isa ang IGRB sa intergovernmental relations mechanisms ng national at Bangsamoro governments na itinatag sa ilalim ng Bangsamoro Organic Law.
Pangunahing tungkulin ng body na resolbahin ang mga isyu sa pagitan ng dalawang partido, partikular ang may kinalaman sa intergovernmental relations, sa pamamagitan ng regular na konsultasyon at patuloy na negosasyon.
Sa kasalukuyan, pinamumunuan ang IGRB nina Budget Secretary Amenah Pangandaman at Bangsamoro Government Education Minister Mohagher Iqbal bilang co-chairperson.
Kasunod ang pahayag ni Marcos ng pagpapalitaw ni dating Pangulong Rodrigo Duterte ng ideya ng paghiwalay ng Mindanao mula sa bansa sa pamamagitan ng prosesong base sa pagkalap ng lagda.
Dating alkalde ng Davao City, inihayag ni Duterte na si Davao del Norte Rep. Pantaleon Alvarez ang unang nagsulong ng “desirability of Mindanao seceding from the Republic of the Philippines.” RNT/SA
