“TRABAHO SA BAGONG PILIPINAS” JOB FAIR SA MAYNILA

NABIGYAN ng pamahalaan ng bagong oportunidad sa pama­magitan ng “Trabaho sa Bagong Pilipinas” job fair sa Maynila ang mga nagsipagtapos na mga benepisyaryo ng Pantawid Pamilyang Pilipino Program (4Ps) upang makaahon mula sa kahirapan sa pagtutulungan ng mga tanggapan ng pamahalaan at pribadong sektor.

Ang job fair, na inorganisa ng Office of the President, Department of Labor and Employment (DOLE), Department of Social Welfare and Development (DSWD), katuwang ang Department of Agriculture (DA) at iba pang tanggapan ng pamahala­an, ay nag-alok ng humigit-ku­mu­lang na 4,476 bakanteng trabaho mula sa 96 kalahok na employer.

Batay sa paunang ulat ng DOLE National Capital Region (NCR), 114 na naghahanap ng trabaho mula sa 2,114 rehistradong aplikante ang na-hire on the spot sa ginanap na job fair.

Ang kaganapan ay alinsunod sa direktiba ni Pangulong Ferdinand R. Marcos Jr. na pagsamahin ang mga programa ng pamahalaan sa iisang lugar para matiyak na ito ay abot-kamay, ang mga benepisyo ay higit na napapakinabangan at makalikha ng positibong epekto sa buhay ng mga benepisyaryo at kanilang mga pamilya.

“Pinalawig namin nang mas dumami pa ang ating mga kababayang may kakayahang tu­gunan ang kanilang sariling mga pangangailangan, dahil ibig sa­bihin nito ay higit na marami pa ang mag-aambag sa pagpapaunlad ng ating bansa,” pahayag ni Special Assistant to the President Anton F. Lagdameo, Jr., bilang kinatawan ni Pangulong Ferdinand R. Marcos Jr. sa kaganapan.

Sa kanyang pambungad na pananalita, sinabi ni DOLE Secretary Bienvenido E. Laguesma na ang kaganapan ay hudyat ng pagsisimula ng pinalawak at pinalakas na paghahatid ng mga serbisyo at programa ng admi­nistrasyong Marcos Jr. upang lubos na matulungan at mai­angat ang mga benepisyaryo ng 4Ps mula sa kanilang kasaluku­yang kalagayan.

“Ating inilunsad at isinasagawa ang isang sama-samang pag­kilos upang tugunan ang kalagayan ng ating 4Ps beneficiaries sa pangkalahatan, tungo sa pag-aangat ng antas ng kani­lang pamumuhay at kabuhayan upang maging produktibong bahagi ng ating lipunan,” aniya.