CEBU, Philippines – Isang 8-anyos na batang lalaki ang namatay habang malubhang nasugatan ang kanyang 63-anyos na lola matapos silang araruhin ng isang truck na biglang umandar kahit walang driver sa manibela.
Nangyari ang aksidente noong Miyerkules ng hapon sa labas ng Balamban Public Market sa Barangay Sta. Cruz-Sto. Niño, Balamban, Cebu.
Ayon sa paunang imbestigasyon at isang saksi na tricycle driver, sinubukang paandarin ng driver ang Fuso Canter na nakaparada sa gilid ng kalsada. Nang hindi ito umandar, iniwan ng driver ang susi sa ignition at hindi hinila ang hand brake bago bumaba upang tingnan ang baterya.
Habang sinusuri niya ang baterya, biglang umandar at bumilis ang truck nang ilang metro. Nasagasaan nito ang batang lalaki at ang kanyang lola na noon ay tatawid sa kalsada. Tumama rin ang truck sa isang tricycle bago tuluyang huminto.
Natagpuan sa ilalim ng truck ang mag-lola. Tinamaan ng isa sa mga gulong ang bata, dahilan upang siya ay malubhang masugatan at pumanaw habang dinadala sa ospital.
Samantala, isinugod din sa ospital ang kanyang lola, na isang biyuda, at nananatiling nagpapagamot dahil sa mga tinamong pinsala.
Ang driver, na nagtatrabaho sa isang commercial store sa loob ng public market, ay nasa police custody na.
Inihahanda ng mga awtoridad ang pagsasampa ng kaso para sa Reckless Imprudence Resulting in Homicide, Physical Injury, at Damage to Property. RNT/MDS
