MANILA, Philippines — Pinuri ng Second Congressional Commission on Education (EDCOM 2) ang Department of Education (DepEd), Commission on Higher Education (CHED), at Technical Education and Skills Development Authority (TESDA) matapos lumagda ang mga ito sa isang kasunduan para sa pagtatatag ng iisang unified at interoperable data system na magta-track sa mga mag-aaral mula sa kanilang unang araw sa paaralan hanggang sa kanilang pagpasok sa trabaho.
Itinuring na makasaysayan ang naturang kasunduan na nilagdaan sa unang Joint Management Committee Meeting ng tatlong ahensya, bilang tugon sa panawagan ng EDCOM 2 na tapusin ang matagal nang pagkakapira-piraso sa datos ng sektor ng edukasyon.
“For too long, our view of a student’s journey has been fragmented. We are finally seeing the complete picture — from their first day in kindergarten to their entry into the workforce,” pahayag ni DepEd Secretary Sonny Angara.
Ayon kay TESDA Director General Jose Francisco Benitez, ang inisyatiba ay isang “game-changer” para sa paghahanda ng mga manggagawa.
“By understanding a learner’s background, we can better guide them into technical-vocational tracks that lead directly to in-demand jobs,” aniya.
Sinabi naman ni CHED Chairperson Shirley Agrupis na makatutulong ang sistema sa paglinang ng scholarship programs, pagpapahusay ng enrolment projections, at pagtiyak na mananatiling angkop ang mga degree offerings.
Gagamitin ng interoperable system ang DepEd’s Learner Reference Number (LRN) bilang unique identifier ng mga estudyante sa lahat ng antas ng edukasyon.
Inaasahan itong magpapahusay sa pagtukoy ng mga benepisyaryo ng programang Pantawid Pamilyang Pilipino Program (4Ps) at Bagong Pilipinas Merit Scholarship Program, gayundin sa pagbibigay ng mas eksaktong enrolment projections para sa state universities and colleges (SUCs).
Target ang pilot implementation sa 2026 at full rollout pagsapit ng 2027.
Kasama rin sa proyekto ang pakikipag-ugnayan sa Department of Information and Communications Technology, Department of Labor and Employment, Department of Social Welfare and Development, at Philippine Statistics Authority upang maiayon ito sa mas malawak na layunin ng pambansang kaunlaran. RNT/JGC
