Home NATIONWIDE VFA, Balikatan  ‘di masasagasaan ng US aid freeze – AFP

VFA, Balikatan  ‘di masasagasaan ng US aid freeze – AFP

MANILA, Philippines- Sinabi ng Armed Forces of the Philippines (AFP) nitong Martes na hindi maaapektuhan ang mga kasunduan tulad ng Visiting Forces Agreement (VFA), na nagbibigay-daan sa pagsasagawa ng “Balikatan” exercises sa pagitan ng Pilipinas at ng United States, ng kautusan ni President Donald Trump na pansamantalang suspensyon ng foreign assistance.

“Sa side ng AFP kasi, ito yun ating mga long-standing agreements with them, which is we have our VFA, diyan nakapaloob ang ‘Balikatan’ and through the years, solid naman ito, kahit nung una pang umupo si President Trump nagtuloy-tuloy naman ito,” pahayag ni AFP spokesperson Col. Francel Margareth Padilla sa isang press briefing sa Camp Aguinaldo, Quezon City.

Ipinag-utos ni Trump ang 90-day pause sa foreign development assistance, habang nirerebyu ang “efficiencies and consistency” sa kanyang foreign policy.

Subalit, sinabi ni Padilla na ang epekto ng aksyon ng Washington “would be assessed by higher authorities.”

Sinabi rin niyang ang VFA at ang “Balikatan” ay mga kasunduan at hindi parte ng US assistance program.

“Basically what will be under review are financial programs funded by the US. Through the years (the VFA), it’s been continuing,” paliwanag ni Padilla.

Batay sa AFP spokesperson, ang “Balikatan” ngayong taon ay magiging isa sa pinakamalaki sa kasaysayan. RNT/SA