Villar nanawagan ng agarang pagpasa ng Comprehensive School Safety Act

MANILA, Philippines — Nanawagan si Sen. Mark Villar sa Senado na agarang ipasa ang Senate Bill No. 2426 o proposed Comprehensive School Safety Act kasunod ng sunod-sunod na insidente ng karahasan sa mga paaralan.

Sa kanyang co-sponsorship speech, sinabi ni Villar na kailangan ng komprehensibo at mabilis na tugon upang maprotektahan ang mga estudyante, guro at school personnel laban sa iba’t ibang banta sa loob at paligid ng mga paaralan.

“Lubos pong nakakaalarma ang sunod-sunod na insidente ng karahasan sa mga eskwelahan. Kailangan po na magkaroon ng comprehensive at holistic na solusyon sa isyu na ito,” ani Villar.

Ang SBN 2426, na nakapaloob sa Committee Report No. 89, ay inisponsoran sa plenaryo ni Senate Committee on Basic Education chairperson Sen. Bam Aquino nitong Agosto 26. Kabilang si Villar sa mga co-sponsor ng panukala.

Layunin nitong magtatag ng comprehensive school safety framework na sasaklaw sa prevention, emergency response at recovery, gayundin sa physical, mental at psychosocial well-being ng mga estudyante at school personnel.

Kabilang sa panukala ang pagtatayo ng localized school safety plans, pagpapalakas ng threat assessment at child protection mechanisms, pagpapalawak ng school-based counseling at mental health services, at pagtatakda ng standards para sa school security infrastructure.

Kasama rin dito ang paggamit ng CCTV systems, visitor management at security screening kung kinakailangan, gayundin ang mas malapit na koordinasyon ng mga paaralan, magulang, local government at law enforcement agencies.

Ayon kay Villar, isinama rin sa substitute measure ang ilang probisyon ng kanyang Senate Bill No. 2321 o LIGTAS Act, na naglalayong palakasin ang school security at emergency preparedness, at Senate Bill No. 2133 o Students’ Guidance Counseling Act, na nakatuon sa mas malawak na access sa guidance at mental health services.

Binigyang-diin din ng senador ang pangangailangang suportahan ang mga guro at school personnel na inaasahang manguna sa pagprotekta sa mga estudyante sa panahon ng emergency kahit nahaharap din sila sa panganib.

“Walang bata ang dapat matakot pumasok sa paaralan at walang magulang ang dapat mangamba kung makakauwi pa ang kanilang mga anak,” ani Villar.

Hinimok niya ang kanyang mga kapwa senador na suportahan ang panukala upang hindi umano maging normal ang kultura ng karahasan sa mga paaralan.