VP Sara nahihiya sa pagkakasangkot ng Pilipinas sa drug trafficking

MANILA, Philippines – Nahihiya si Vice President Sara Duterte sa pagkakasangkot ng Pilipinas sa regional drug trafficking.

Ito ay matapos mapag-alaman na Pilipinas ang destinasyon ng bulto-bultong iligal na droga na ipadadala sana mula Laos sakay ng private jet.

Dahil dito ay nanawagan si Duterte sa pamahalaan na paigtingin ang anti-drug operations upang maiwasan ang muling pagtaas ng paggamit ng iligal na droga at adiksyon.

Sa press conference sa ika-91 anibersaryo ng Office of the Vice President (OVP) sa Mandaluyong City, sinabi ni Duterte na ang pinakahuling insidente ay nakakahiya para sa bansa, partikular na sa relasyon nito sa mga kalapit na Southeast Asian nations.

“Nahiya ako sa ating mga kapit-bahay dito sa Southeast Asia dahil tayo yung naging sentro pa ng drug trafficking dito sa ating region,” ani Duterte.

Nagpasalamat naman siya sa pamahalaan ng Laos at Thailand sa kanilang anti-illegal drug operations na aniya ay nakakatulong para maprotektahan ang pamilyang Filipino.

“Pero nagpapasalamat tayo, nagpapasalamat ako sa gobyerno ng Laos at ng Thailand dahil yung ginawa nilang anti-illegal drug operations doon sa kanilang bansa saved so many Filipino families”

“Kaya sana ganun din yung pag-iisip ng pamahalaan ng Pilipinas na palakasin yung anti-illegal drugs operations para yung consumption, yung mga addict, ay hindi dumami,” pagtatapos ni Duterte. RNT/JGC