MANILA, Philippines- Walang nakikitang dahilan ang National Security Council (NSC) para imbestigahan si Western Command chief Vice Admiral Alberto Carlos ukol sa umano’y “gentleman’s agreement” sa pagitan ng Pilipinas at Tsina sa Ayungin Shoal.
“Insofar the NSC is concerned, we see no reason to investigate Vice Admiral Carlos kasi wala ngang ganung agreement na nangyari,” ayon kay NSC Assistant Director General Jonathan Malaya sa isang panayam.
Inulit ni Malaya na ang pag-angkin ng Beijing ay “preposterous” lalo pa’t hindi kailanman pumasok sa nasabing kasunduan ang Pilipinas.
“Vice Admiral Carlos is a bemedaled member of the Philippine Navy…Kawawa naman siya at dinadawit siya sa insinuations, fake stories and disinformation coming from the Chinese Embassy,” ayon kay Malaya.
Ibinasura naman ng mga opisyal ng Department of National Defense (DND) kabilang na sina National Security Adviser Secretary Eduardo Año at Secretary Gilberto Teodoro Jr. ang alegasyon ng Tsina, sabay sabing ang”new model” claim ay “clear attempt by China to advance another falsehood to divide our people and distract us from their unlawful presence and actions” sa exclusive economic zone (EEZ) ng Pilipinas.
“I would like to clearly state that any insinuation that the Department of National Defense is a party to any ‘new model’ is a devious machination of China through their Embassy in Manila, and it is curious that it comes right after their actions were condemned in the recent SQUAD meeting in Honolulu, Hawaii,” giit ni Teodoro.
Para naman kay Malaya, nagdesisyon na si Año na huwag nang magpalabas ng kalatas hinggil sa nabanggit na kasunduan.
Sa nasabing ‘gentleman’s agreement’ sa pagitan nina dating Pangulong Rodrigo Roa Duterte at Chinese President Xi Jinping, pumayag umano si Duterte na hindi magdadala ng construction materials ang mga barko ng Pilipinas sa BRP Sierra Madre na nasa Ayungin Shoal at binabantayan ng mga sundalong Pinoy.
Itinanggi naman ni Duterte ang kasunduan. Wala rin umano siyang ipinamimigay na teritoryo. Kris Jose
