MANILA, Philippines – Nilinaw ng Department of Education (DepEd) nitong Huwebes na ang Friday work-from-home (WFH) policy ay para lamang sa non-teaching personnel sa mga opisina ng DepEd, habang ang mga guro at school-based staff ay kinakailangang pumasok sa kanilang mga paaralan.
Ayon sa memorandum na may petsang Marso 11, saklaw ng WFH arrangement sa ilalim ng DepEd Memorandum No. 18, s. 2026, ang non-teaching at kaugnay na personnel sa central, regional, at division offices.
Susunod ang mga guro sa kanilang regular na iskedyul ng klase upang matiyak ang tuloy-tuloy na pagtuturo at mga aktibidad sa pagtatapos ng taon.
Bahagi ang patakaran sa pagsisikap ng pamahalaan na makatipid ng enerhiya sa pamamagitan ng apat na araw ng onsite work mula Lunes hanggang Huwebes, at itinalagang WFH ang Biyernes para sa mga kwalipikadong empleyado.
Nilinaw din ng DepEd na pansamantalang suspindido ang WFH para sa non-teaching staff sa mga paaralan. Nananatiling epektibo ang iba pang probisyon ng memorandum.
Inilabas ang memo ni DepEd Undersecretary at Chief of Staff Fatima Lipp Panontongan. Santi Celario
