Pagbabawal sa e-trikes, e-bikes sa ilang kalsada sa NCR gumulong na

MANILA, Philippines- Magpapatupad ang Metropolitan Manila Development Authority (MMDA) ng ban sa e-bikes, e-trikes, at mga katulad na sasakyan sa major roads sa Metro Manila simula ngayong Lunes, Abril 15.

Pagmumultahin ang mga lalabag sa regulasyong ito ng P2,500. Samantala, mai-impound naman ang ang mga sasakyang walang lisensya o registration documents.

Nakasaad sa Memorandum Circular No. 4 ng MMDA ang mga kalsada kung saan ipinagbabawal ang e-bikes, e-trikes, tricycles, at “kuligligs” kabilang ang mga sumusunod: Claro M. Recto Avenue, President Quirino Avenue, Araneta Avenue, Epifanio Delos Santos Avenue, Katipunan/C.P. Garcia, Southeast Metro Manila Expressway, Roxas Boulevard, Taft Avenue, Osmeña Highway, Shaw Boulevard, Ortigas Avenue, Magsaysay Boulevard/Aurora Boulevard, Quezon Avenue/Commonwealth Avenue, A. Bonifacio Avenue, Rizal Avenue, Del Pan/Marcos Highway/McArthur Highway, Elliptical Road, Mindanao Avenue, Marcos Highway, Boni Avenue, España Boulevard, at iba pang tinukoy ng MMDA. 

Inihayag ni MMDA General Manager Procopio “Popoy” Lipana na babalaan ang mga mahuhuli ngayong Lunes at sa Martes.

“(Then) on the 17th (Wednesday) we will strictly implement ‘yung corresponding penalty nila. Iisyuhan sila ng ticket or kukumpiskahin natin or i-impound kung walang lisensya o rehistro ang kanilang sasakyan,” ani Lipana sa isang panayam. RNT/SA