IPINAALAM ng Philippine Health Insurance Corporation (PHILHEALTH) na kasalukuyan nilang iniimbestigahan ang tinatayang 1,000 kaso ng “ghost patients” na kaugnay ng mga kahina-hinalang claims na nabayaran na sa ilang health care providers.
Ayon sa legal unit ng PHILHEALTH-Cordillera Administrative Region (CAR), ang mga insidenteng ito ay kinasasangkutan ng mga indibidwal na nakalista bilang gumamit ng PHILHEALTH benefits mula 2022 hanggang 2024, ngunit natuklasang hindi naman sila nagpagamot. May ilan pang ulat na pumanaw ang mga pasyente bago pa man ang petsa ng diumano’y isinagawang serbisyo medikal.
Bukod dito, natukoy rin ang mga doble o duplicate claims, katulad ng kaso ng isang pasyente na naitala na sumailalim sa dialysis sa dalawang magkaibang ospital sa parehong araw.
Ganito rin ang sitwasyon sa ilalim ng “Yaman ng Kalusugan Program” (YAKAP).
Tinatayang umabot sa Php680,000 ang kabuuang halagang nabayaran para sa mga kahina-hinalang claims na ito.
Ayon sa PHILHEALTH- CAR, ilang insidente ang lumabas matapos makatanggap ng text message ang mga miyembro na nagsasabing nabayaran na ang claims para sa serbisyong hindi naman nila ginamit.
Mayroon ding natuklasan sa pamamagitan ng walk-in inspections at routine monitoring ng mga pasilidad medikal.
Upang mapigilan ang ganitong uri ng pandaraya, nagsasagawa ang PHILHEALTH-CAR ng legal at provider summits; biglaan o unannounced inspections ng mga pasilidad; claim validations sa pamamagitan ng home visits; at text notifications sa mga miyembro hinggil sa paggamit ng kanilang benepisyo. Dagdag pa PHILHEALTH-CAR na mas pinapahalagahan na ngayon ng ahensya ang text notifications dahil madalas na hindi natatanggap ang mga sulat na ipinapadala sa mail, na nagdudulot ng hindi kinakailangang gastos.
Kapag natapos na ang due process at napatunayang may sala ang isang health facility, maaaring ipataw ang mga parusa sa ilalim ng Republic Act No. 11223, kabilang ang suspension ng accreditation at pagmumulta.
