CHILE – Nagdeklara ang Chile ng state of catastrophe sa mga rehiyon ng Ñuble at Bío Bío sa katimugang bahagi ng bansa matapos na ikasawi ng hindi bababa sa 16 katao ang malalakas na wildfire at mapilitang lumikas ang halos 20,000 residente, ayon kay Pangulong Gabriel Boric nitong Linggo ng madaling araw.
Iniulat ng CONAF forestry agency ng Chile na may 24 aktibong sunog sa buong bansa hanggang Linggo ng umaga, kung saan ang pinakamalalaking apoy ay nasa Ñuble at Bío Bío, mga 500 kilometro timog ng Santiago.
Sinabi ni Security Minister Luis Cordero na 15 katao ang kinumpirmang namatay sa Bío Bío, na nagdala sa kabuuang bilang ng mga nasawi sa 16 matapos makumpirma ang isang pagkamatay sa Ñuble noong Sabado.
Nasunog na ang halos 8,500 ektarya sa dalawang rehiyon, dahilan upang maglabas ng evacuation orders habang nanganganib ang ilang komunidad.
Ayon sa disaster agency na Senapred, halos 20,000 katao ang nailikas at hindi bababa sa 250 bahay ang nasira.
Sinabi ng mga awtoridad na pinalala ng malalakas na hangin at mataas na temperatura ang pagkalat ng apoy at nagpahirap sa mga bumbero na makontrol ang mga sunog.
Nasa ilalim ng extreme heat alerts ang malaking bahagi ng Chile, na may inaasahang temperatura na aabot sa 38°C mula Santiago hanggang Bío Bío sa Linggo at Lunes.
Naranasan ng Chile at Argentina ang matinding init at wildfire mula pa sa simula ng taon, kabilang ang malawakang sunog sa Patagonia sa Argentina nitong unang bahagi ng buwan. RNT
