MANILA, Philippines- Nadakip ng mga awtoridad ang dalawang indibidwal nitong araw ng Pasko sa Lapu-Lapu City, Cebu at nasabat ang P6.8 milyong halaga ng shabu, base sa Philippine Drug Enforcement Agency (PDEA) nitong Biyernes.
Sinabi ng PDEA na nadakip ang mga suspek na kinilalang sina alyas Jesson, 30, at kanyang pamangkin na si alyas John, 26, sa isang buy-bust operation bandang alas-3:50 ng hapon nitong Miyerkules sa Sitio Lower Matumbo sa Barangay Pusok.
Nakumpiska ng mga awtoridad ang halos isang kilo ng shabu, buy-bust money, isang smart phone, at iba pang non-drug evidence.
Nakatakas naman ang isa pang suspek na kinilala sa pangalang Rasheed.
Isinumite na ang nasamsam na ebidensya sa Forensic Unit 7 ng Philippine National Police para sa chemical analysis.
Nahaharap ang mga suspek sa kasong paglabag sa Republic Act 9165, o ang Comprehensive Dangerous Drugs Act of 2002. RNT/SA
