2 armadong suspek nanlaban sa checkpoint, 1 patay

San Fernando, Pampanga – Isang mabilis na police operation ang naganap sa Brgy. Anunas, Angeles City noong Pebrero 18, 2025, bandang 5:30 PM, kung saan isang armadong suspek ang napatay habang ang kanyang kasamahan ay nasugatan at naaresto matapos ang engkwentro sa mga awtoridad.

Inalerto ng Angeles City Command Center ang Angeles City Police Office (ACPO) tungkol sa dalawang kahina-hinalang indibidwal na gumagala sa Korean Town, isang lugar na may mga naitalang insidente ng pang-aagaw. Dahil dito, agad na nagsagawa ng surveillance operation ang mga operatiba ng City Intelligence Unit (CIU) at Police Station 4 (PS4), ACPO.

Nang tangkain ng mga suspek, sakay ng isang itim na Aerox motorcycle na walang plate number, na umiwas sa checkpoint ng pulisya, nagpakilala ang mga opisyal. Subalit, sinubukan ng backrider na magpaputok ng kanyang baril ngunit hindi ito pumutok.

Sa mabilis na tugon ng mga operatiba, binaril ang driver ng motorsiklo na agad na nasawi, habang ang backrider na si “Alex,” residente ng Magalang, Pampanga, ay nasugatan at naaresto.

Kasalukuyang isinasagawa ang beripikasyon sa pagkakakilanlan ng nasawing suspek.

Narekober sa pinangyarihan ang isang US COLT .45 caliber pistol na may partially defaced serial number, isang magazine na puno ng anim na bala, isang chamber-loaded na live round, at isang fired bullet.

Ayon kay Police Brigadier General Jean S. Fajardo, Regional Director ng PRO3, ang matagumpay na operasyon ay patunay ng kahandaan at dedikasyon ng Angeles City police sa pagpapanatili ng kaayusan at seguridad sa lungsod. Pinuri rin niya ang kanilang mabilis at epektibong aksyon upang tiyakin ang kaligtasan ng publiko. RNT