2 DPWH engineer, kakasuhan ng LTO sa pekeng lisensya

MANILA, Philippines – Posibleng kasuhan ng Land Transportation Office (LTO) ang dalawang engineer ng Department of Public Works and Highways (DPWH) na umano’y gumamit ng pekeng driver’s license para makapasok sa casino.

Ayon kay LTO chief Vigor Mendoza, binigyan ng show cause order sina Assistant District Engineer Brice Hernandez at dating Bulacan District Engineer Henry Alcantara, na sangkot din sa flood control project mess.

Nakaamba sa kanila ang pagbawi at habambuhay na diskwalipikasyon sa pagkuha ng lisensya.

Sinabi ni Mendoza na iniimbestigahan na kung saan nakuha ang mga pekeng ID at nakikipag-ugnayan sila sa cybercrime division para palakasin ang seguridad ng mga lisensya.

Samantala, inaresto ng PNP Anti-Cybercrime Group ang isang mag-asawa sa Valenzuela City na nagbebenta ng pekeng government IDs at dokumento, kung saan nasamsam ang 391 na piraso ng mga pekeng ID. Santi Celario